Поучна приказна: Како ќе се поставиме, така ќе се однесуваат со нас

Си бил некој човек кој живеел во јужна Индија и сакал да тргне по патот на духовноста.
Тоа во Индија значело да се изолираш од луѓето, да седнеш некаде на тивко место, во шума, џунгла или пештера и да медитираш.
Човекот отишол во шумата и избрал место кое било блиску до селото, за да може лесно да дојде до храна.
Седнал и почнал да медитира. Кога огладнел, отишол во селото по храна и потоа се вратил во шумата.
Кога се стемнило, човекот забележал една лисица на која двете предни нозе ѝ биле отсечени, но и покрај тоа, таа сепак била здрава и нахранета.
Човекот бил изненаден, но сепак одлучил да ја игнорира лисицата и да продолжи со својата медитација.
По извесно време забележал дека се приближува некој лав, па заборавил на својата медитација и се качил на најблиското дрво.
На негово огромно изненадување, големиот лав дошол со парче месо во устата, го спуштил пред лисицата и таа го изела месото.
Човекот не можел да им поверува на своите очи. Помислил: „Ова е чудо. Ова е порака од Господ”.
Следната вечер повторно се случило истото.
Човекот веќе немал дилема дека тоа е порака од Господ до него, но не бил сигурен што значи пораката.
После долго размислување, ја интерпретирал пораката на следниов начин: „Во оваа шума дури и лисица без нозе може да преживее така што ја храни еден лав. Тогаш што барам јас да се враќам во селото по храна? Само ќе седам овде и храната сама ќе ми дојде”.
Така тој продолжил да медитира и воопшто не прекинувал за да бара храна. Од ден на ден бил сѐ послаб и послаб и многу потешко можел да седи исправен.
По извесно време веќе не можел повеќе ни да седи. Бил сосема истоштен и скоро мртов.
Некој друг јогин поминувал тука и слушнал лелекање од човекот кој умирал. Дошол до него и го прашал: „Што ти се случило? Зошто си во ваква состојба?”
Човекот му одговорил: „О јогину, те молам помогни ми. Добив порака од Господ, направив како што тој ми кажа и се најдов во оваа ситуација”.
Јогинот повторно го прашал што точно се случило.
Човекот му ја објаснил целата ситуација: „Гледај, онаму има лисица без нозе и секој ден ја храни еден голем лав. Нели е тоа порака од Господ до мене? ”
Јогинот го погледнал и му рекол: „Тоа е дефинитивно порака од Господ, но зошто ти наместо да избереш да бидеш како дарежлив лав, избра да бидеш како беспомошна лисица?”