Поучна приказна: Ризикот е пат кон успехот!

На патот кон успехот, стравот е најголемата пречка на која ќе наидете, и доколку си дозволите да ве победи, никогш нема да дознаете колку далеку би стигнале. Единствено ризикот е она нешто што може да го победи стравот. А стравот постои само во вашата глава. И само вие можете да го победите со храбар чекор напред.

Прочитајте ја оваа приказна и свртете нов лист…

Во една земја каде имало војна, владеел страшен и лош крал. Еден ден, на своите заробеници им дал можност да одберат како сакаат да умрат. Ги затворил во една просторија во која на едната страна имало чета од стрелци, а на другата страна врата за која се слушале приказни дека крие мртви и окрвавени затвореници.

Ги поставил затворениците во круг и им рекол:

„Може да одберете и да умрете избодени од стрелите на мојата чета или да поминете низ оваа врата и да останете таму засекогаш“.

Речиси сите одбрале да умрат побрзо, погодени од стрела.

Еден од затворениците го запрашал кралот: „А што има зад оваа врата?“

„Отвори ја и погледни“ – рекол кралот.

Војникот собрал храброст и со тешка мака ја отворил вратата. Тогаш во очите му блеснал силен сончев зрак. Кога ги отворил убаво очите, се изненадил што видел дека вратата, всушност, води кон слобода!

Се завртел кон кралот и му рекол: „Секогаш сте им давале избор на затворениците, но тие повеќе сакаа да умрат, отколку да ризикуваат и да ја отворат оваа врата!“

Никогаш не знаеш што се крие зад затворената врата. А ќе дознаеш само ако ја отвориш…