Диета и купки со кои полесно ќе се справите со целулитот
Некои состојки во храната можат многу да помогнат во отстранувањето на целулитот, односно на насобраните маснотии во телото.
Оваа медицински испитана антицелулитна диета е разновидна и богата со различни вкусови и дава брзо видливи резултати. Диетата овозможува слабеење на местата каде што е потребно, но, имајте во предвид дека само слабеењето не е доволно за исчезнувањето на целулитот. За борбата против целулитот е потребна дисциплина бидејќи мора да се води постојано, во подолг временски период. Придржувањето кон оваа диета секако ќе ви помогне во борбата.
Храна која треба да се избегнува: сувомеснати производи, црвено месо, готови јадења, грицки, сосови, мајонез, путер, пржена храна, слатки и торти.
Храна која се препорачува: свежо овошје и зеленчук, ладно цедено маслиново масло, интегрален ориз и тестенини, интегрален леб, печурки, мед, риба, бело месо, интегрални житарки, јогурт и обезмастено млеко.
Сведете ги на минимум солта (избегнувајте коцки за супа, вегета, сосови и сл. бидејќи содржат сол во големи количини), шеќерот и кафето.
Три елементи, кои често недостасуваат во секојдневната исхрана, помагаат во отстранувањето на штетните материи од организмот, и на тој начин во отстранувањето на целулитот.
Сулфур – го има во храната богата со животински протеини како месо, риба, млеко, сирење, јајца. Го поттикнува ослободувањето од наталожените токсини, кои се резултат на неправилната исхрана.
Калиум – го има во млекото, овошјето, житарките, патлиџанот, компирот. Помага во отстранувањето на вишокот течности, со што се ублажуваат отоците.
Витамин Ц – го има во јужното овошје, патлиџанот, магданосот, кромидот, ренот, во свежото и суво овошје… Го зголемува производството на колаген и оневозможува наталожување на масни клетки во ткивата.
Главниот акцент во исхраната треба да се стави на овошјето и зеленчукот бидејќи тие го прочистуваат организмот. Бананите, цитрусното овошје, лубеницата, дињата, компирот и патлиџанот се многу богати со калиум, а шумското овошје како боровинката е богато со биофлавоноиди кои ја помагаат микроциркулацијата. Одличен избор е и ананасот кој е и богат со влакна. Исто така треба да се зголеми и внесот на водата на 2,5 литри дневно (сметајќи ја и водата во храната) поради елиминација на отровите од организмот.
Многу е важно храната соодветно да се подготвува. Зеленчукот и овошјето се јадат свежи или подготвени на пареа без маснотии, а месото најдобро да се пече на скара со малку маслиново масло.
Пример на план за исхрана за 3 дена
Ден 1
Доручек: филџан кафе (од јачмен по можност), житарици со безмасен јогурт
Ужина: чаша исцеден сок од портокал
Ручек: салата со школки и пиперка, салата од патлиџани и рикола
Ужина: шумско овошје попрскано со лимон
Вечера: пилешки гради на жар попрскани со лимон, наместо сол, варен копар со лимон, ананас по желба.
Ден 2
Доручек: филџан кафе (од јачмен по можност), интегрални крекери, мед
Ужина: фрапе од кајсии и манго
Ручек: салата со ориз, спанаќ со лимон, сорбе од лимон
Ужина: една банана
Вечера: моцарела или свежо кравјо сирење, салата од зелен варен зеленчук, ананас
Ден 3
Доручек: филџан кафе (од јачмен по можност) со немасно млеко, интегрални бисквити
Ужина: фрапе од мед
Ручек: супа, интегрален леб
Ужина: кајсии или праски
Вечера: варена бела риба, блитва зачинета со маслиново масло и лимон, интегрален леб, шумско овошје.
Ова е само предлог диета, а доколку имате намера сериозно да се позанимавате со целулитот или вишокот килограми (или и двете) најдобро ќе биде да се обратите на стручно лице, нутриционист, кој ќе ја следи и контролира вашата диета.
Покрај диетата, ви предлагаме и две купки кои ќе ви помогнат во справувањето со целулитот:
Купка од сол и ѓумбир во прав против целулит
Во топла купка се додаваат две до три лажици морска сол и потоа се ставаат 15 г. ѓумбир во прав. По купката задолжително намачкајте се со некоја крема или млеко за тело бидејќи ѓумбирот ја суши кожата и потребно е да се нахрани по третманот.
Купка со бршлен против целулит
100 г. листови од бршлен се варат 10 минути во 1 л. вода, се процедува и течноста се додава во купката. Купката со бршлен ја поттикнува циркулацијата и топењето на поткожните масни наслаги.