Поради генетски предиспозиции некои семејства се поподложни на рак

Британскитe научници спровеле истражувања на пациенти заболени од редок вид карцином – сарком, и утврдиле дека некои семејства се поподложни на заболување од рак поради генетските предиспозиции, се наведува во студијата од кои резултатите се објавени во стручното списание The Lancet Oncology.

Во случаите на заболените од сарком, утврдено е дека половината од испитаниците се родени со генетска мутација кој ја зголемува опасноста од тоа пациентот да заболи од рак. Оттаму, според научниците наследните мутации може да бидат главната цел на лекувањето, а на семејствата треба да им се понудат стручни совети и почести контроли.

Наследните мутации на гените поврзани со ракот на дојката, на јајниците и дебелото црево, меѓу другото, се откриени и кај пациентите заболени од сарком.

Професорот Јан Џадсон кој го водел истражувањето на лондонскиот Институт за истражување на рак, изјави дека е неопходно потребно да се обрати поголемо внимание на наследниот фактор. „Понекогаш сме убедени дека некоја болест е наследна, но стандардните обрасци на ризиците не се совпаѓаат. Сега ќе можеме да утврдиме дали тоа е така поради постоењето, на пример, на трите мутации“, вели Џадсон.

Саркомот е вид на ракот кој се развива во коските, мускулите и во мекото ткиво. Често ги погаѓа децата и младите, а стапката на преживување е многу ниска. Токму поради тоа британските научници се одлучиле да откријат повеќе за генетските предиспозиции за наследување на овој вид карцином.

Анализирале ДНК секвенца на 72 гени поврзани со зголемениот ризик од рак на 1.162 пациенти заболени од рак. Кај секој петти се откриени мутации или грешки во најмалку еден генетски тест на ракот. Забележани се поголеми изгледи за развој на карцином кај пациенти со мутации на повеќе гени на ракот во нивната порана возраст отколку кај пациентите со само една генетска мутација.

Овој заклучок упатува на тоа дека појавата на саркомот кај некои пациенти го предизвикуваат повеќе „здружени“ генетски мутации, а не само една генетска грешка.

Професорот Џадсон смета дека по откривањето на ваквите мутации кај поедини пациенти, нивните семејства би требале да бидат подвргнати на генетски скрининг, како и да им се понудат соодветни совети, со што ќе може порано да се открие и многу поефикасно да се лекува овој вид тумор.