Две девојки се венчаа во центарот на Белград!

Организаторите на Парадата на гордоста во Белград организирале перформанс на улицата Кнез Михајлова, во кој се венчале две девојки.

Во стилот на “флешмоб”, акција популарна ширум светот, перформансот го привлекол и задржал вниманието на случајните минувачи.

Се започнало кога на платото пред Српската академија на науките и уметностите одеднаш се појавиле два пара младоженци кои танцувале и ги поздравувале минувачите.
За само неколку минути на присутните им станало јасно дека таа венчавка ќе биде малку поинаква од вообичаените. Младите невести во еден момент се фатиле за раце и почнале да танцуваат, а младоженците мистериозно исчезнале.

Присутен бил и “матичар” со лента во боите на знамето на Србија, пред кој жените една на друга си ги ставиле бурмите и се бакнале.

Целиот настанот е снимен со камери, а видеото за кратко време се појавило и на YouTube. Организаторите на парадата снимката ја објавиле и на својот Facebook профил со потписот: “Љубовта помеѓу Верата и Надежта е крунисана со венчавка во центарот на Белград”.

На крајот на видеото се појавува и кратка порака: “6-ти октомври: само 970 чекори со нас!”.