Која е вистинска прва дама? Ивана Трмап со гостувањето на телевизија ја налути Меланија

Првата сопруга на американскиот претседател Доналд Трамп, Ивана, и актуелната, трета сопруга, Меланија, се спречкаа околу тоа која има право да го користи епитетот „прва дама на САД“.

Судирот беше предизвикан од промотивната кампања која Ивана Трамп ја води за својата нова книга, насловена „Растејќи го Трамп“ и во која раскажува за животот со Доналд и нивните три деца, Доналд Јуниор, Иванка и Ерик.

Во интервју за емисијата „Добро утро Америка“, Ивана Трамп изјави дека има директна линија со претседателот, се слуша со него секои две недели и дека се чувствува како прва сопруга, – Јас сум првата дама, ок?, изјави таа.
Меланија Трамп возврати преку нејзината портпаролка Стефани Гришам.

– Домот на г-ѓа Трамп е во Белата куќа, каде живее заедно со синот Барон и со претседателот. Таа ужива во животот во Вашингтон и е почестена со тоа што ја носи титулата прва дама на САД, изјави Гришам во име на Меланија Трамп, додавајќи дека вистинската прва дама „планира да ја искористи својата титула за да им помогне на децата, а не да продава книги“.

Доналд Трамп беше оженет три пати, со чешката манекенка Ивана Зелничкова (1977-1992), со актерката Марла Мејлпс (1993-1999) со која ја има ќерката Тифани, и со словенечката манекенка Меланија Кнаус (од 2005), со која го има синот Барон.

Во првите месеци од претседателството на Доналд Трамп, додека Меланија се уште живееше во Њујорк, некои од американските медиуми како де факто прва дама на САД ја прогласија неговата ќерка Иванка, која е и советничка на претседателот.