НАУКАТА ДОКАЖА: Крокодилите во праисторијата биле високи колку луѓето и се движеле на две нозе

Некои видови древни крокодили веројатно се движеле на задните нозе, како диносаурусите или ноевите, покажале истражувањата врз основа на добро сочуваните фосилни остатоци пронајдени во Јужна Кореја. Скоро сто траги во должина од 18 до 24 см се зачувани во калливиот талог околу езерото, кој датира од раниот Креда период, последниот дел од Мезозоикот, односно периодот од 110 до 120 милиони години пред нашата ера.

Меѓународниот тим кој стои зад откритието вели дека најверојатно ќе ја доведе во прашање нашата перцепција за крокодилите. “Луѓето имаат тенденција да мислат на крокодилите како животни кои се доста мрзливи и лежат на бреговите на Нил или на реките во Костарика. Никогаш никој не се прашувал како би било такво животно да се движи на задните нозе, како ној или Т -рекс “, изјави Мартин Локли, професор на американскиот универзитет во Колорадо.

Студијата сигурно ќе предизвика жива дебата затоа што не сите истражувачи нужно ќе го прифатат толкувањето на американските научници. Резултатите од студијата беа објавени во четвртокот вечерта во списанието Scientific Reports, а во него, покрај американски учествуваа и австралиски и јужнокорејски научници. Отпрвин се сметаше дека фосилизираните стапалки откриени во она што сега е Јужна Кореја припаѓаат на антички летечки влекач, Птеросаур, предок на модерни птици, но по истражувањето, научниците веруваат дека тие припаѓаат на крокодилите што се движеле на две задни нозе.

„Најдовме отпечатоци на едно место за кои верувавме дека им припаѓаат на џиновските птеросаури, но сега претпоставуваме дека ова се траги од крокодили“, рече еден од авторите на студијата, Ентони Ромилио, палеонтолог на Универзитетот во Квинсленд. „Отпечатоците се долги 24 сантиметри, што укажува дека висината на нозете на суштествата што ги оставиле е приближно иста како и висината на нозете на возрасно лице“, објасни тој. „И додека беа пронајдени стапалки на целата локација, не најдовме отпечатоци од предните нозе или раце“, рече Ромилио.

 Водачот на истражувањето Киунг Соо Ким од Националниот универзитет на Јужна Кореја во Чинџу изјави дека траекторијата на отпечатоците е „многу тесна“ и дека изгледа како траекторијата оставена од крокодилот што балансира на тенко јаже“, а се знае дека крокодилите оставаат зад себе крива со широко движење. „Кога го додадовме фактот дека нема траги од влечење на опашката, за нас стана појасно дека овие суштества се движат на две задни нозе“, рече тој.

„Покрај тоа, стапалата не личат на оние што ги оставаат диносаурусите кои се движат по прстите. Крокодилите се движат со полни нозе, оставајќи јасни ознаки на потпетици, како луѓето“, објасни Ким.