НБА размислува за одигрување на останатите натпревари на имотот на Дизни на Флорида

Сезоната на НБА лигата беше прекината на 11 март заради пандемијата од коронавирус, а во лигата се надеваат дека натпреварите можат да продолжат во средината на јули.

Управата на лигата разговара со компанијата Дизни за да можат натпреварите да се играат на спортскиот комплекс ESPN, огромен кампус на имотот на Дизни во близина на Орландо.

Портпаролот на НБА, Мајк Бас изјавил дека разговорите се засега информативни и дека тој комплекс освен за натпревари може да послужи и за тренинг и за престој. Тој исто така изјавил дека приоритет е здравјето и безбедноста на сите учесници и дека прават се за да ги обезбедат сите медицински протоколи и заштита.

Кампусот се протега на 225 хектари, има многу сали во кои можат да се играат натпревари истовремено.

На целиот комплекс на Дизни има речиси 24.000 хотелски соби.

НБА лигата работи на многу сценарија за враќање на натпреварите, во чиј склоп ќе се прават и редовни тестирања на коронавирус.