Корицата на априлското издание на италијанскиот Вог ќе ве остави без зборови!
Априлското издание на магазинот „Вог“ излегува на 10 април, а неговата корица е повеќе од симболична.
Наместо некоја манекенка или актерка која инаку ги краси насловните страни на ова списание, уредниците се одлучија за бела, скоро целосно празна насловна. Освен името на магазинот и месецот во кој е објавено, на насловната страница нема апсолутно ништо.
„Во својата долга историја што трае повеќе од сто години, Вог мина низ војни, кризи, терористички напади. Неговата благородна традиција е никогаш да не изгледа поинаку. Нешто помалку од пред две недели, требаше да го печатиме изданието што го планиравме некое време, во кое беше вклучено и L’Uomo Vogue. Но сега да се зборува за било што друго додека луѓето умираат, а лекарите и медицинските сестри ги ризикуваат нивните животи и светот се менува засекогаш не е во ДНК на „Vogue Italia“. Затоа ја стопиравме нашата првична одлука и почнавме од почеток. Одлуката да се испечати потполно бела насловна за прв пат во нашата историја не е затоа што недостасуваа слики – токму спротивното. Го избравме затоа што белото симболизира многу работи истовремено“, рече редакцијата предводена од главниот и одговорен уредник Емануеле Фарнети.
Тие, исто така, објаснија што им значи белата боја.
„Бело пред се означува почитување. Белата боја е повторното раѓање, светлина по темнината, збирот на сите бои. Белата е бојата на униформата што ја носат оние што ги ставаат своите животи на предната линија за да ги спасат нашите животи. Претставува простор и време за размислување, како и за тишина. Бело е за оние кои го исполнуваат овој празен простор со идеи, размислувања, приказни, стихови, музика и грижа за другите. Белата боја нè потсетува на времињата по кризата во 1929 година, кога оваа беспрекорна боја преовладуваше на облеката како израз на чистота во сегашноста и надежта во иднина. И пред сè, белото не е предавање, туку празен лист што чека да се отпечати, на насловната страница на новатa приказна што треба да започне“, додаваат тие.