Пилулата може да спречи тешка форма на ковид-19 или може да биде втора линија на одбрана во случај да се појави имуноотпорен вид на вирусот
Пилулата на Фајзер што спречува ковид-19 би можела да биде достапна до крајот на годината доколку се докажат успешни испитувања врз луѓе спроведени во САД и Белгија, пишува „Дејли меил“.
„Во моментов, нема други лекови освен вакцини за спречување на инфекција со ковид-19, но ако се открие еден, тоа може засекогаш да ја елиминира опцијата за локдаун“, рече еден експерт.
Фајзер започна да го тестира својот експериментален лек врз луѓе. Антивирусен лек, наречен PF-07321332, може да се даде на луѓе кои почнале да покажуваат симптоми на инфекција за да ги спречат да развијат тешка форма на болеста.
Иако повеќето луѓе ќе бидат вакцинирани, вакцините не се 100 проценти ефикасни. Исто така, некои луѓе нема да можат да ги добијат, што значи дека корона вирусот ќе продолжи да се шири и да биде опасен за незаштитените лица.
Таблетите можат да помогнат во спречување на тешки форми на ковид-19 кај луѓе кај кои вакцините не работат добро, или може да бидат втора линија на одбрана во случај на појава на нов имуноотпорен сој на вирусот.
Тестирање на повеќе испитаници
Во моментов, околу 60 лица се вклучени во првата фаза од испитувањето на Фајзер со лекот PF-07321332, што треба да заврши на 25-ти мај. Потоа, ако таблетите се покажат безбедни, ќе се направат поголеми тестови со повеќе испитаници за да се докаже дека тие дефинитивно спречуваат инфекција со ковид-19, како што е предложено со лабораториски испитувања.
Британскиот премиер Борис Џонсон минатата недела објави дека неговата влада формира работна група за пронаоѓање и купување на антивирусни лекови кои можат да излечат ковид-19 дома.
Професорот Кевин Блит од Универзитетот во Глазгов спроведува испитување на антивирусниот лек фавипиравир што може да се даде откако некој е заразен со вирусот. „Би било голем чекор напред ако дејствуваат антивирусните лекови. Вообичаените услуги ќе можат да работат и не би морале да бидеме во локдаун “, рече тој за Дејли Меил.
На фармацевтските компании вообичаено им требаат неколку години за производите да поминат студии, тестирање, производство и лансирање на пазарот, но науката забрза за запирањето на ковид-19. На Фајзер му требаше помалку од една година да ја направи вакцината и да започне со вакцинирање на луѓе, а PF-07321332 би можел да биде готов до крајот на оваа година.
Тестовите што се во тек треба да ја тестираат безбедноста на таблетите, откако лабораториските експерименти покажаа дека тие имаат „моќен антивирусен ефект“. Апчињата делуваат така што се врзуваат за специфични ензими кои вирусот ги користи за репродукција, со што го принудуваат да престане да се репродуцира и шири.
Лекот припаѓа на типот наречен инхибитор на протеаза и слични лекови веќе се користат за запирање на вируси како ХИВ и хепатит Ц. Фајзер не најде докази за несакани ефекти во студиите врз животни и сега ќе тестира здрави луѓе за тоа како лекот влијае врз нив. Доколку добро го толерираат, истражувањето ќе биде проширено на поголем број граѓани.