Со цел да се фотографираат за социјалните мрежи, туристи доаѓаат од целиот свет, но овој канал не е наменет за тоа
Солената пустина Боневил во северозападна Јута веќе неколку години е хит меѓу туристите во САД. Тоа е прекрасна област долж Големото Солено Езеро – најголемото природно солено езеро на Западната хемисфера и едно од најсолените во светот. Интересот на туристите за оваа област се зголеми во последната година откако на интернет се појавија фотографии од синиот канал. Неодоливата боја на водата во каналот за разлика од белата средина создава совршена сцена за фотографирање, особено фотографија за социјалните мрежи.
Иако истражувањето на необични и скриени места е омилена активност на светските патници, сепак е важно да се почитуваат правилата на локалното население на одредена област. Синиот канал е делумно на приватна сопственост – има знаци што забрануваат задржување насекаде – и не треба да се посетува без претходно одобрување од сопственикот. Покрај тоа, треба да знаете дека каналот не е природен феномен, туку вештачки направен за индустриски цели. Имено, локалната компанија Intrepid Potash го користи каналот како дренажен ров во процесот на вадење минерали. Иако водата не е отровна, таа не е наменета за капење. Исто така, локалните власти предупредуваат дека некои делови од синиот канал може да бидат нестабилни, што значи дека може да се срушат.
Да се остане тука не е добра идеја, дури и по цена да се направи совршена фотографија за Instagram. Локалните полицајци почнаа да пишуваат казни за да ги спречат љубопитните луѓе да стигнат до синиот канал. Најдобро е да уживате во неговата убавина од безбедна далечина – преку нашата галерија со фотографии.
