НЕОДОЛИВА ПАСТА КАРБОНАРА! Омилено јадење на љубителите на италијанската кујна

Карбонара е јадење со тестенини и се смета за речиси незаменливо во италијанската кујна. Се подготвува на едноставен начин, многу е хранливо и има доста јак вкус

Едно од омилените јадења се познатите тестенини карбонара. За нивна подготовка се користат долги тестенини – шпагети или таљатели, или фетучини. Еве како да направите кремаста карбонара според оригинален италијански рецепт.

Состојки:

100 гр сланина

2 жолчки

50 гр пармезан

200 гр тестенини по избор

сол, бибер

магдонос

маслиново масло

Подготовка:

Ставете ја пастата да се вари во вода во која сте додале малку сол. За тоа време изматете ги жолчките, додадете малку сол и бибер, па пармезанот и сè изматете со вилушка. Во смесата додадете малку сечкан магдонос и оставете ја на страна.

Во тава сипете малку маслиново масло и кога ќе се загрее додадете ја сланината исечкана на ленти и пропржете со постојано мешање. Пред сланината да стане целосно крцкава, процедете ги тестенините. Додадете го во тавата во која се наоѓа сланината, па додадете ја смесата со жолчка и пармезан.

Важно е да не ги оставате шпагетите премногу долго во тавата, бидејќи жолчката ќе почне да се вари, со што ризикувате јадењето да стане гумено наместо кремасто. Промешајте уште еднаш за да се соединат состојките, па префрлете од тавата во сад и посипете со сечкан магдонос.

Пријатно!