Сигурно барем еднаш ви се случило стаклените чаши кои се всушност чисти воопшто да не изгледаат чисто. Честопати делуваат некако матно, а причините за тоа можат да бидат различни.
Сепак, постои многу едноставно решение за кое се потребни само неколку состојки, а ќе ви одземе околу 15 минути од вашето време.
Во некои случаи главната причина зошто чашите се без сјај е премногу тврдата вода, додека во други може да се работи за чаши матни поради бришењето. Освен што со едноставен трик можете да го вратите сјајот на вашите чаши, истиот можете да го вратите и кај други работи од стакло, како на пример вазните, но и површини како маси и прозорци.
Враќање на сјајот
Ќе ви треба алкохолен оцет, обична вода и крпа од микрофибер. Чашите прво оставете ги да киснат околу 5 минути во оцетот. Киселината ќе ги уништи остатоците од бигор, ќе ги неутрализира евентуалните непријатни мириси, а доколку и натаму приметувате дека чашите не се сјајни, тогаш на прст ставете малку смеса од сода бикарбона измешана со вода и нежно тријте на местото на кое недостасува сјај.
По оцетот, потребно е чашите добро да се измијат со топла, но не врела вода. Наредниот чекор е клучен, а тоа е бришењето на чашите со крпа од микрофибер.
Враќање сјај на други стаклени површини
Кога станува збор за други стаклени површини кои се нешто поголеми, како што се стаклени маси или пак прозорци, оцетот треба да го испрскате по површината и да оставите да делува помеѓу 5 и 15 минути. Потоа површината треба да се избрише со мокра крпа од микрофибер, а потоа и со сува за стаклото побрзо да се исуши.