Удирање со бамбусов стап како воспитна мерка во Сингапур

Апелацискиот суд во Сингапур денеска донесе решение според кое казната тепање на осудени криминалци со бамбусов стап, често извршувана и на јавни места, не е во спротивност со Уставот. Постапката за преиспитување на уставноста на овој закон ја започнаа адвокатите на нарко-дилерот Јонг Јуи Конг, кој бил фатен со 47 грама хероин и беше осуден на смртна казна, која му беше заменета со 15 годишен затвор и 15 удари со бамбусов стап.

Веројатно охрабрени од успехот со замената на смртната казна со затворска, адвокатите на осуденикот покренаа и постапка за укинување на казната тепање со стап, наведувајќи дека тоа е нехумано и било практика на темните години од средниот век.

Апелациониот суд на Сингапур во образложението на пресудата наведува дека Сингапур не е ретка држава каде и тепањето со бамбусов стап се применува како воспитна и предупредувачка мерка. Според судиите, ваквото казнување на криминалците нема врска со законите кои забрануваат тортура над затворениците.