Трендот на носење апостолки се врати, но докторите сепак предупредуваат колку е опасна оваа обувка

Едноставните летни папучи попознати како апостолки имаат специфични ремчиња, а својата слава ја достигнаа во 2000-тите. Сега повторно се враќаат на модната сцена како незаменлив моден додаток.

Во последните неколку сезони модниот свет е сведок на враќање на трендовите од минатото, а еден од нив што го забележавме меѓу трендсетерите е враќањето на популарноста на апостолките. Сепак, лекарите препорачуваат да не се опуштите премногу со овој тип на обувки.

Апостолките станаа синоним за летни обувки поради нивната едноставност, практичност и можност за дишење. Нивниот препознатлив дизајн со пластични ремени и гумени ѓонови обезбедува удобност и леснотија на движење, што ги прави идеален избор за опуштени летни денови. Меѓутоа, денешните модни трендови одат чекор подалеку и апостолките сега се носат во различни пригоди, без разлика дали се свечени или неформални.

Познати личности шетаа во Кан со апостолки

Имено, минатата година во Кан познатите луѓе решија да се откажат од потпетиците на црвениот тепих во корист на апостолките. Една од нив беше Џенифер Лоренс, која комбинираше црни апостолки со луксузен црвен фустан со потпис на Диор.

Модните експерти и дизајнери го препознаа потенцијалот на апостолките како стилски додаток и почнаа да ги комбинираат со разни предмети за облека. Сега можете да видите апостолки кои се носат со лелеави летни фустани, фармерки, здолништа, шорцеви, но и елегантни вечерни фустани. Овој контраст помеѓу лежерните и елегантни елементи ги прави апостолките исклучително интересен моден детал кој привлекува внимание.

Опасни последици од носење апостолки

Лекарите предупредуваат дека апостолките не се најдобриот избор за здравјето на нашите стапала.

Д-р Пол Маколеј, попознат како @paulthepodiatrist на TikTok, ги предупредува луѓето да не носат рамни апостолки.

„Имаме голем проблем овде во Азија бидејќи сите носат апостолки постојано. За жал, некои луѓе не се подготвени за тоа“, рече тој.

Апостолките се на врвот на неговата листа на најлоши обувки.

„Биомеханичките нерамнотежи доведуваат до повреди од прекумерна употреба, како што се плантарен фасциитис и заден тибијален тендинитис“, додаде тој.

Тој нагласува дека на апостолките им недостасува поддршка и сигурност за стапалото.

„Некои луѓе кои носат апостолки со години може да доживеат вкочанетост на прстите“, предупреди тој, а потоа покажа фотографија од стапало со свиткани прсти.

„Носењето чевли со дополнителен ремен на пета може да помогне. Луѓето со ограничена подвижност се изложени на ризик да се сопнат и паднат ако носат лабави обувки како што се апостолки. И дијабетичарите треба да бидат внимателни. Кога носат апостолки, може да се повредат, што може да доведе до поголем проблем како што е инфицирана рана која, повторно, може да доведе до ампутација доколку не се среди правилно“, предупреди тој.

На крајот, како што вели, апостолките се добри ако се носат на плажа или се користат за шетање на плажа, но „во нив воопшто не е препорачливо да се оди од 5.000 до 10.000 чекори дневно“, пренесува Citymagazine.