Папандреу: На Грција и’ се заканува анархија

Грчкиот премиер Јоргос Папандреу предупредил дека насилните протести заради острите мерки за штедење, воведени на барање на меѓународните кредитори, се потенцијална закана од анархија и варварство кои ја рушат демократијата во Грција исто како и во минатото.

Мерките за штедење, кои меѓународните финансиски институции ги побараа во замена за паричната помош на презадолжената Грција предизвикале напади на политичарите и крвави демонстрации на улиците во грчката престолнина, каде дошло до судири помеѓу младите демонстранти и полицијата.

Еден неименуван владин претставник прецизирал дека Папандреу не мисли дека постои ризик од воспоставување на воен режим.

“Премиерот не мисли дека демократијата е во опасност. Тој смета дека насилството ќе овозможи антидемократско однесување и ги потсетил луѓето на историјата кога во Грција од 1967 до 1974 година владееле воените хунти“, додава грчкиот владин претставник.

Мерките за штедење, кои опфаќаат намалување на платите во јавниот сектор и зголемување на даноците, се воведени во текот на најтешката рецесија која ја погоди Грција од воспоставување на демократијата и се’ крајно непопуларни мерки кај грчкото население.

Извор: Нетпресс