Од 3 до 10 евра: Венеција наскоро ќе почне да им наплаќа на туристите за еднодневно патување или излет во градот

Целта на системот за платена резервација не е да го ограничи бројот на туристи во историскиот центар, туку да поттикне некои посетители да го посетат градот во помалку популарен период од годината кога цената на резервацијата ќе биде пониска.

„Ќе започнеме со експериментална фаза во која резервациите нема да бидат задолжителни, туку опционални“ и ќе бидат бесплатни, изјави претставникот за венецијански туризам Симоне Вентурини.

На посетителите кои доаѓаат на еднодневни патувања ќе им биде понудено однапред да се регистрираат за стимулативни резервации, „како што се попусти на билети за музеј“, рече Вентурини. Датумот на стапување во сила на новиот систем ќе биде објавен во наредните недели.

Системот, кој постои со години, ќе стане задолжителен во 2023 година, кога посетителите на еднодневни патувања ќе треба да плаќаат надомест од три до десет евра, во зависност од периодот во кој ќе го посетат центарот на градот.

Посетителите кои ќе преноќат во Венеција и веќе ја плаќаат таканаречената туристичка такса, нема да мора да плаќаат резервација.

Животот во многу популарниот град на вода полека се враќа во состојбата во која беше пред пандемијата, кога гондолите исчезнаа од Гранд Канал откако исчезнаа туристите.

Овогодинешните велигденски празници привлекоа огромен број посетители, од кои 100.000 ноќеваа во градот, а 40.000 пристигнаа на само неколку часа да ѝ се восхитуваат на базиликата Св. Марко или воздивнаа на Мостот на воздишките, рече Вентурини.

Огромниот број посетители значат и долги редици луѓе кои чекаат да се возат со венецијанските „vaporetti“ или пред музеите, но и двојни резервации за хотели.

Одамна е познато дека многу туристи му го загорчуваат животот на малото локално население кое сè уште живее во историскиот центар.

Градоначалникот на Венеција, Луиџи Бруњаро рече дека системот за резервации е „вистинскиот начин за порамномерно управување со туризмот“.

„Ќе бидеме првите во светот што ќе го спроведеме овој експеримент“, напиша тој на Твитер.

Откако резервациите ќе станат задолжителни, влезот на посетителите во центарот на градот ќе се контролира на автобуските и железничките станици, двете главни точки каде туристите пристигнуваат во градот.