Иако ресорт хотелите не се нов концепт, сепак напредокот во архитектонскиот дизајн заедно со технолошкиот прогрес ја пренасочија индустријата на луксузот во сфери кои претходно беа незамисливи. Едно такво парче рај е Casa De La Flora Resort во провинцијата Phangnga во Тајланд. Дизајниран е од страна на студиото за дизајн и архитектура VaSLab од Банког, а 36-те коцкасти вили внесуваат модерен изглед на традиционалната околина од палми и песочни плажи.
Континуитетот на дизајнот е видлив како во ентериерниот, така и во екстериерниот дизајн на ресортот, вклучувајќи ги тука и вградените кревети и кабинети како и рачно изработениот мебел на дизајнерското студио кој пак прекрасно се вклопува во недопрената околина. Предниот дел на вилите е целосно во стакло, а внатрешниот дел е направен од цементни површини и ѕидови од природен камен со дрвени подови и плафони.
