Кошаркарската репрезентација на Македонија ја победи репрезентацијата на Босна и Херцеговина со убедливи 75-63. Со оваа четврта победа Македонија сега во осмина-финалната група ќе оди со 4 бода, и за пласман во четвртфиналето ќе и биде потребна само една победа. Најубаво би било доколку работата си ја завршиме во среда во 14:30, кога играме против репрезентацијата на Грузија.
Стандардно репрезентацијата ја предводеа Перо Антиќ и Лестер Бо Мекејлеб. Капитенот имаше дабл-дабл учинок со 15 поени и 14 скокови, додека Бо Мекејлеб повторно беше најефикасен во нашиот тим и постигна 22 поени. Војдан Стојановски повторно одигра одлично во одбраната, тој имаше 4 украдени топки, надополнети со 5 скокови.
Иако на полувреме заминавме со 3 поени негатива, имавме фуриозно второ полувреме. На почетокот на третата четвртина почнавме агресивно, одигравме одлично во одбраната и така направивме серија од 14-0. Репрезентацијата на Босна и Херцеговина во третата четвртина не успеа да постигне кош скоро шест минути. Ова беше пресудно за натпреварот, и ние до крајот само го одржувавме водството и победивме со 12 разлика.