Владата на Непал наредила повторно да се измери Монт Еверест, највисокиот врв во светот, за да се утврди колку вистинки е висок, изјавиле владини претставници во Катманду.
Непал ја признава висината на Монт Еверест од 8.848 метри, висина која важи со децении. Меѓутоа, од неодамана планинари од Кина и други западни земји почнале да изнесуваат други проценки.
Портпаролот на министерството за земјишни реформи Гопал Гири изјавил дека владата минатата недела на годишната расправа за буџетот, одлучила повторно да го истражи и измери “покривот на светот“.
Подготовките се во тек, а се планира на самиот врв на Еверест да се постават уреди кои ќе ја измерат висината со помош на сателитска технологија, системот за глобално позиционирање (GPS), изјавил Гири.