Еден вработен во компанијата Apple се нашол во големи проблеми откако во еден мексикански бар во Сан Франциско оставил прототип од iPhone. Скоро истата работа се случила и со iPhone 4.
Многу очекуваниот нов модел на iPhone, кој сеуште службено не е претставен, неодамна е пронајден во текила барот Cava 22 во Сан Франциско.
Порталот Cnet.co.uk пишува пак дека Apple не пријавил никаква загуба во полицијата во Сан Франциско, а сопственикот на барот Cava 22 изјавил дека не го контактирала ниту полицијата ниту Apple, иако се сеќавал на повици за изгубен iPhone пред месец дена.
Скоро ист настан имало и во април 2010, кога софтверскиот инжењер на Apple случајно оставил прототип од тогаш новиот iPhone 4 во една пивница во Калифорнија. Тој прототип тогаш е продаден преку интернет на технолошкиот блог Gizmodo.
Во истрагата која што следела откако Gizmodo ги објавил првите фотографии од прототипот на iPhone 4, двајца мажи биле обвинети за кражба на телефонот, но уредникот на Gizmodo, Џајсон Чен, на крајот сепак бил ослободен од обвиненијата затоа што не знаел дека телефонот всушност бил украден, а не „изгубен”.
Овој случај го натерал Apple дополнително да ги зголеми своите мерки на безбедност, така да тешко е да се поверува дека скоро истата работа повторно се случува, и тоа поради глупостите на вработените.
Откако овој настан добил големо внимание во јавноста, по само два месеца, на 24 јуни 2010 година, Apple го претставил долго очекуваниот iPhone 4.
Иако од Apple сеуште нема службени информации, многумина, сметаат дека новиот iPhone 5 на пазарот ќе се појави во октомври.
На ова во прилог одат и фотогарфиите кои се појавија оваа недела, а кои, наводно прикажуваат производни делови од новиот модел на iPhone 5 кои стигнале до кинеските препродавачи, иако според сликите можно е и да се работи за делови од iPhone 4S.