Хрватскиот свештеник Фрањо Јурчевиќ осуден е поради дискриминација, поттикнување на дискриминација и вознемирувања врз основа на сексуалната ориентација.
Окружниот суд во Риека ја прифатил тужбата за дискриминација, која против свештеникот ја поднел центарот на LGBT еднаквост и Центарот за мировни студии и го прогласиле за виновен поради неговите хомофобични текстови и екстремистички ставови на неговиот блог.
Судскиот совет го прогласил свештеникот за виновен поради статијата „Белградска теорема“, и „Колку што ми е познато до сега ниту еден новинар во Хрватска не ги осудил перверзиите на лезбејките и хомосексуалците во Шпанија“, кои биле објавени на неговиот блог на 10 ноември 2010 година.
Судскиот совет утврдил дека Јурчевиќ дискриминирал, поттикнувал на дискриминација и правел вознемирување врз основа на сексуалната ориентација, нарекувајќи ги членовите на LGBT заедницата „болесници“, „перверзни“, „бесрамни бедници“, „луѓе со болна ориентација“, „ненормални“, „настрани луѓе“.
Судот му наредил на Јурчевиќ да престане да пишува дискриминирачки текстови, како и да ги тргне во рок од осум дена спорните текстови од неговиот блог.
Фрањо Јурчевиќ во јануари месец е прогласен за виновен за „ расна и друга дискриминација“, а осуден е на три месеци условна затворска казна во кривичната постапка која против него ја водел Јавниот обвинител во Риека.