Денес, жените имаат за два пати поголеми шанси да страдаат од депресија одколку пред 40 години, тврдат експертите.
Причината е што жените постојано се обидуваат да жонглираат со семејството и кариерата, па во еден момент стануваат преоптоварени и им се смачува од сè. Истражувачите кои ги проучувале менталните здравствени проблеми кај жените во Европа, со сигурност тврдат дека бројот на депресивни жени во споредба со 1970 година е удвоен.
Како најризична група се сметаат жените помеѓу 16 и 42 години, особено кога планираат да родат дете. Жените од оваа старосна група имаат помеѓу 10 и 13 проценти поголеми шанси да станат депресивни, што е двојно повеќе од нивните машки врсници.
Од 80-тите до 90-тите години бројот на депресивни жени бил константен, без осцилации. Меѓутоа, современиот начин на живот и модерните потреби си го чинат своето. Денес, жената мора да биде и мајка и домаќинка и сопруга и да заработува, а тоа создава огромен притисок.
Иако во центарот на ова истражување беа жените, сепак, ни мажите не се поштедени од депресија. Разликата е што тие одбегнуваат да зборуваат за тоа и често никогаш не одат да добијат дијагноза од лекар за тоа.