Штетните ултравиолетови зраци предизвикуваат агресивни промени на горниот слој од кожата и ги уништуваат клетките. И тоа до тој степен што се стига до мутација – карценогена форма односно меланом. Колку побрзо биде откриен, толку поголема е веројатноста да се излекува. Од тоа зависи и големината и длабочината на инвазијата. Не мислете дека сте безбедни ако не се „печете“ на сонце. Меланоми можат да изникнат и во области кои не биле изложени на сонце, вклучително и стапалата, меѓу прстите на нозете, дури и под ноктите.
Ако забележите некои нови бенки или промена на формата, бојата или големината на веќе постоечките, или ако некоја од нив започне да крвари, треба задолжително да се оди на дерматолог.
Раната дијагностика и брзото хируршко одстранување во повеќето случаи може наполно да го излекува пациентот. Светската статистика вели дека меланомот е вториот по застапеност рак кај жените на возраст меѓу 20 и 29 години и може да предизвика смрт.