Стење

На западниот брег на Преспанското Езеро, во подножјето на планината Галичица на надморска височина од 855 метри, на самата граница со Република Албанија, се наоѓа селото Стење. Селото Стење се наоѓа на 23 километри западно од централното градско подрачје на Ресен.

Самите стенчани сметаат дека нивното село името го добило по стените кои го надвисувале на неговата првобитна локација.

Стење е богато со природни и културно-историски места. Во самото село се наоѓаат црквите Св. Кирил и Методиј (1911 г.), која се наоѓа во центарот и Св. Атанас (16 в.), на крајот од селото. Плажата во Стење е посебна геолошка реткост – таа се состои од ситен кварцен песок, остаток од глацијалниот период.

За оние коишто сакаат да уживаат во пешачење низ природата, Стење пружа прекрасна можност за такви прошетки – покрај езерото до прекрасниот залив Лиса и селото Коњско, по планинските патеки низ Галичица, по кои можете да стигнете до превојот Пресека, од каде како на дланка се гледаат двете езера (Охридското и Преспанското). На планината ќе имате можност да собирате цвеќиња и лековити билки и чаеви.

Во близина на Стење се наоѓа и надалеку познатиот остров Голем Град до кој можат со чамец да ве прошетаат локалните жители од Стење. Но, сите посети на самиот остров треба да се договорат со Националниот парк “Галичица”. Од културно-историските споменици ви препорачуваме да ги посетите манастирската црква Св. Илија (1921 г.), во заливот Лиса, црквата Св. Петар (19 в.), на островот Голем Град и пештерската црква Св. Петка (19 в.).

Кога ќе се најдете во Стење, штета ќе биде да не пробате специјалитет од познатите преспански риби – крап и сушена белвица-циронка. Љубителите на риболовот можат и самите да уживаат во спортскиот риболов долж брегот на Езерото во Стење или, пак, да ги посматраат вештите локални рибари.