Зимска идила од соништата: топла и хармонично уредена планинска оаза, од која воздишки крадат фасцинантните глетки на снежните падини и прекрасните бели пејзажи. ,,El Lodge Ski & Spa Resort’’ е извонредно зимско одморалиште во Сиера Невада, Шпанија, дел од хотелската групација ,,Marbella Club’’. Луксузниот скијачки комплекс е вистински рај за љубителите на зимувањето и зимските спортови, канејќи на уживање во убавото време под шпанското сонце, многубројните ски – стази и комфорното сместување кое ја разгалува душата. Дизајнот на хотелот е инспириран од нордиските дрвени градби и традиционалните алпски колиби, со многу гламур, луксуз и шарм внесен преку декорот и деталите во секоја соба. Со автентичната градба, и интимната големина која сочинуваат вкупно 20 соби, комплексот го задржува амбиентот на приватна колиба за посетителите, совршено вклопувајќи се во сликовитото природно опкружување. Нуди бројни погодности и услуги за одмор и релаксација, а заштитен знак на одморалиштето е прекрасната тераса, позната како ,,Suite Nevada’’, најстилизираното место за пауза од снежната авантура, и дење и ноќе.
