Сокот од домати многу поволно делува на целиот организам, но во некои случаи треба да се избегнува.
Не е лесно да се набројат сите придобивки што ги има сокот од домати кога е здравјето во прашање.
Кога е свеж и без адитиви, сокот од домати е одличен извор на витамините А и Ц, па поволно делува на имунитетот, здравјето на забите и на коските. Богат е со витамин Б6, за кој се верува дека го разградува хомоцистеинот, аминокиселина која ги оштетува крвните садови.
Сокот од домати го намалува нивото на лошиот холестерол во крвта благодарение на ниацинот што го содржи, го подобрува тенот и го стимулира варењето.
Нутриционистите советуваат дека е најздрав кога се подготвува дома, бидејќи купечкиот може да содржи дополнителни шеќери кои ги намалуваат неговите корисни својства.
“Ова е најдобриот сок за негување на срцевиот мускул. Корисен е за деца, жени и мажи од сите возрасти. Нискиот гликемиски индекс автоматски го става сокот од домати на листата на храна за дијабетичари”, тврди нутриционистот Елена Моисева и истакнува дека неговите предности се тоа што е нискокалоричен и има висока содржина на калиум.
„Меѓутоа, во некои случаи, сокот од домати може да направи повеќе штета отколку корист. Особено кај акутен панкреатитис и гастритис. Покрај тоа, конзумирањето со скробни намирници, како што се компирите, оризот и лебот, може да доведе до камења во бубрезите“, додаде таа и посочи дека во случаи кога нема контраиндикации, најдобро е сокот да се пие половина час пред оброк.