Следната година на лондонскиот V&A доаѓа ретроспективна изложба за работата на познатата дизајнерка Габриел Шанел: „Fashion Manifesto“, која ја анализира нејзината долга кариера, личен стил и придонес во историјата на модата.
Лондонскиот музеј ќе додаде ретки артефакти од своите архиви на изложбата курирана од Palais Galliera во Париз, а посетителите ќе можат одблиску да ги видат парчињата што ги носат дивите како Марлен Дитрих и Лорен Бекол.
Габриел „Коко“ Шанел го промени начинот на облекување на почетокот на 20 век, а некои од нејзините дизајни останаа дел од современиот моден канон. Во својот дизајн, таа тргна од себе и смисли креации за активна и независна модерна жена. Нејзината чанта Шанел 2.55, првата мејнстрим чанта за на рамо, беше и остана најпознатата чанта на овој моден бренд и знак на престиж.
На изложбата ќе бидат претставени 180 изгледи, накит, модни додатоци, козметика и парфеми од отворањето на нејзиниот бутик во 1910 година до последната колекција во 1971 година.
Изложбата се отвора во Музејот V&A на 16 септември 2023 година и ќе трае до 25 февруари 2024 година, така што сите заинтересирани љубители на модата имаат доволно време да патуваат инспирирани од модата и врвниот дизајн.