Спенсер Елден, маж кој како бебе се појави на насловната страница на албумот „Nevermind“ на Нирвана, минатата година ги тужеше музичарите и фотографот за, како што рече, сексуална експлоатација, а сега таа тужба е отфрлена во корист на популарната група.
31-годишниот Спенсер Елден рече дека неговото појавување на насловната страница на албумот „Nevermind“ е „сексуална злоупотреба на деца“, но судијата рече дека е „доцна да се тврди дека бил експлоатиран“. Правните опции на Елден сега се целосно исцрпени бидејќи тој не може повторно да го отвори случајот, иако неговиот правен тим изјави за американските медиуми дека ќе се жалат на пресудата.
Имено, предмет на тужбата била познатата фотографија од бебе кое голо плива во базен кон банкнота од долар на јадица. Тој тврдеше дека како бебе не можел да се согласи на користење на сликата и барал отштета од 150.000 долари. Меѓу обвинетите беа фотографот Кирк Ведл и поранешните членови на Нирвана – Дејв Грол и Крист Новоселиќ и Кортни Лав, вдовицата на починатиот пејач Курт Кобејн.
Елден го поднесе случајот во 2021 година, тврдејќи дека сè уште има право да се жали на фотографијата, бидејќи тоа „му предизвикува проблеми и го чини заработка како возрасен“. Тужбата беше отфрлена, а потоа повторно поднесена во јануари. Судијата во Лос Анџелес во петокот пресуди дека Елден го поднел својот случај многу подоцна од 10-годишниот рок на застарување. Адвокатот на одбраната посочи дека случајот „нема основа“.
Одбраната тврдела дека Елден уживал да биде „бебето на Нирвана“, истакнувајќи дека на тој начин повторно позирал во подоцнежниот живот. На родителите на господинот Елден им биле платени 200 долари за фотографијата во 1991 година, додека албумот на Нирвана „Nevermind“ е продаден во над 30 милиони примероци, што го прави еден од најпродаваните албуми на сите времиња.