Ковид-19 го зголемува ризикот од згрутчување на крвта до шест месеци по добивањето на болеста, според студијата објавена денес во British medical Journal- BMJ
Шведската студија покажува зголемен ризик од длабока венска тромбоза (згрутчување на крвта во ногата) до три месеци по инфекцијата со Ковид-19, белодробна емболија (згрутчување на крвта во белите дробови) до половина година и крварење (како вид на мозочен удар) до два месеци по добивањето на болеста.
Овој ризик е поголем кај пациенти со други болести и кај оние кои имале тежок ковид-19. Тоа беше позабележително за време на првиот бран на пандемијата во споредба со вториот и третиот бран, според студијата.
Веќе беше познато дека „Ковид-19“ го зголемува ризикот од тешки згрутчувања на крвта (позната како венска тромбоза), но имаше помалку информации за тоа колку долго трае тој зголемен ризик и дали варира во различни бранови на епидемијата.
За време на студијата, истражувачите идентификуваа повеќе од милион луѓе во Шведска кои биле заразени помеѓу 1 февруари 2020 и 25 мај 2021 година, по возраст, пол и место на живеење, и ги споредиле со повеќе од четири милиони луѓе кои не биле позитивни на тестот за Ковид.
Според истражувачите, зголемениот ризик за време на првиот бран на инфекција во споредба со двата што следеа може да се објасни со подобрени третмани подоцна или покриеност со вакцинација кај постари пациенти.
Тие сметаат дека овие резултати ги оправдуваат мерките за спречување на случаи на тромбоза, како што е употребата на лекови кои го спречуваат формирањето на згрутчување во крвните садови, особено кај пациентите со висок ризик и ја нагласуваат важноста на вакцинацијата против Ковид-19.
Се посочува важноста на вакцинацијата против Ковид, пренесува Би-би-си. Постои ризик од згрутчување по вакцинацијата, но тој е далеку помал, претходно утврдила голема британска студија.