Случаи на мајмунски сипаници се појавија во вторникот во Словенија, Чешка и Обединетите Арапски Емирати, а се очекува бројот на случаи да се зголеми, иако експертите велат дека ризикот за општата популација останува низок.
Сипаници досега се откриени во Европа, Австралија и Америка, а симптомите вклучуваат треска и осип. Тие се појавија и во Обединетите Арапски Емирати, каде што е откриена мајмунска сипаница кај патник кој неодамна бил во Западна Африка и сега е на лекување.
Светската здравствена организација вели дека вирусот може да биде содржан со навремен одговор во земјите надвор од Африка каде што не постоел. „Повикуваме на зголемен надзор на мајмунските сипаници за да може да се види и разбере колку брзо се шири и како“, рече една од директорките на СЗО, Силви Брајанд, на конференцијата во вторникот.
Досега, 237 случаи на мали сипаници се потврдени надвор од Африка, а здравствените власти ширум светот најавија планови за спречување на ширењето на вирусот.
Германија соопшти дека во случај на ширење на инфекцијата, нарачале околу 40.000 дози од вакцина што се користи за спречување на ширењето на мали сипаници, која е ефикасна и кај мајмунските сипаници. Германските здравствени власти велат дека луѓето кои биле вакцинирани против сипаници порано во животот треба да бидат имуни на мајмунски сипаници, пренесува ВВС.
Во Франција, каде што се пријавени три случаи на инфекцијата, здравствените власти најавија насочена кампања за вакцинирање на возрасните кои биле изложени на вирусот. Тамошните експерти препорачуваат вакцинација во рок од четири дена по изложувањето на вирусот или до 14 дена потоа, доколку е потребно.
Досега во Англија се пријавени 71 случај на инфекција со мајмунска сипаница. Инфекцијата најчесто се поврзува со патување во централна или западна Африка, но некои случаи не се поврзани со неа.