Познатиот Боб Сагет (65) е пронајден без знаци на живот во хотелот „Рик-Карлтон“ по стенд-ап настап во Орландо. Актерот и комичар неколку часа претходно на социјалната мрежа Твитер напишал дека е пресреќен поради тоа како поминала неговата изведба, а неколку часа подоцна во неговиот хотел пристигнале амбулантни возила и пожарникари, по што била констатирана смрт.
Од канцеларијата на локалниот шериф соопштија дека не се пронајдени траги на насилна смрт или употреба на дрога, а причината за смртта ќе биде утврдена со обдукција, пренесува CNN.
Боб Сагет светската слава ја стекна со улогата во ситкомот „Full House“ во осумдесеттите години на минатиот век и улогата на самохран татко Дени кој одгледува три ќерки.
Има снимено десетици улоги, главно во комедии, а со години успешно настапува низ Америка и важи за еден од омилените стендап комичари. На пошироката јавност ѝ е најпознат по тоа што беше наратор во серијата „How I Met Your Mother“, каде беше гласот на главниот лик Тед додека на своите деца им ја раскажува приказната за судбоносната средба со сопругата.