Храната што ја јадете после тренинг е исто толку важна како и храната што ја јадете пред да одите во теретана или групна програма за вежбање.
– Правилниот избор на храна по тренингот е неопходен за мускулите да растат побрзо, а пред се да се опорават од напорите на кои биле изложени – вели Натали Ален, професорка по биомедицински науки на Универзитетот во Мисури.
– Кога вежбате, вашите мускули користат резерви на гликоген. Кога ќе го завршите тренингот, особено оној со висок интензитет, резервите на гликоген ќе ви бидат исцрпени и ќе ви треба „гориво“. Доколку не ги „наполните“ мускулите со вистинските хранливи материи, ќе се чувствувате уморни во следните неколку часа.
Исто така, за време на напорни вежби, мускулната маса може да претрпи оштетување. Ова често се случува после тренинг кој се фокусира на градење мускули. Но, според проф. Ален, ако ја изберете вистинската храна за оброк после вежбање, закрепнувањето ќе биде многу побрзо.
Идеален оброк после тренинг треба да содржи протеини и јаглехидрати. Протеините ќе им помогнат на мускулите побрзо да се опорават после вежбање, а јаглехидратите ќе помогнат да се зголеми нивото на гликоген. Храна богата со јаглехидрати која е добра за јадење после тренинг се слаткиот компир, киноата, овесната каша или овошјето, додека протеинските опции вклучуваат јогурт, лосос или јајца.
Колку време е потребно од вежбање до првиот оброк?
За да го извлечете максимумот од секоја храна, се препорачува да јадете половина час по тренингот.
– Доколку теретаната во која вежбате е далеку од вашиот дом, па ви треба повеќе од половина час за да се вратите дома, испијте барем јогурт после тренинг, а потоа остатокот од оброкот јадете го дома. Мускулите ќе ви бидат благодарни за тоа – советува проф. Ален.