Легендарната актерка Бети Вајт почина во својот дом во петокот наутро неколку недели пред нејзиниот 100-ти роденден.
„Иако наскоро требаше да наполни 100 години, мислев дека ќе живее вечно“, изјави агентот на актерката и близок пријател Џеф Витјас во изјава за People.
„Ќе ми недостига ужасно исто како и животинскиот свет што толку многу го сакаше. Мислам дека Бети никогаш не се плашеше од смртта затоа што сакаше повторно да биде со својот сакан сопруг Ален Луден. Таа веруваше дека повторно ќе биде со него“, додаде тој.
Вајт беше најпозната по нејзината улога во ситкомот „Златни девојки“ и серијата „Шоуто на Мери Тајлер Мур“. Таа исто така глумеше во серијата „Кливленд лудило“ и филмот „Принуден брак“ со Сандра Булок и Рајан Рејнолдс.
Смртта на актерската легенда ја изненади јавноста бидејќи за овонеделното издание на магазинот People, посветено на нејзиниот 100-ти роденден, кој би го прославила на 17 јануари, таа проговори за тајната на своето добро здравје.
„Имам среќа што имам толку добро здравје и се чувствувам толку добро на оваа возраст. Неверојатно е“, рече таа.
Таа објасни дека оптимизмот е во нејзината природа. „Го земав од мајка ми и никогаш не се смени. Секогаш наоѓам позитивна страна во сè“, рече таа.
Таа се пошегува дека е на диета. „Се обидувам да избегнувам зелена храна. Мислам дека функционира“, изјави духовитата Бети.
Вајт, која зад себе има завидна актерска кариера, откри дека ужива во мирниот живот во Лос Анџелес и дека сака да решава крстозбори и да игра со карти. Таа, исто така, поминуваше време гледајќи документарци за животни и играјќи голф.
