Во шестата, последна сезона на серијата на Нетфликс „The Crown“, која започнува да се емитува на 16 ноември, дел ќе биде посветен на младата Кејт Мидлтон, која ја игра 19-годишната Мег Белами. Оваа актерка само што завршила средно училиште, ова ѝ е прва улога, а ја добила на аудиција. Мег ја видела поканата на социјалните мрежи и сама ги снимила видеата и им ги испрати на продуцентите. За неа се вели дека е навистина веродостојна како младата Кејт од периодот кога идната принцеза студирала на колеџот Св. Ендрјус, каде што студирал и принцот Вилијам. Парот се запознал таму, а останатото е историја.
И колку и да е пофалена за одличната улога, надежната актерка изненади на неодамнешната премиера на серијата во Лос Анџелес. Имено, додека многумина очекуваа актерката да ја ископира безвременската елеганција на принцезата од Велс на црвениот тепих, Мег се појави во предизвикувачки сатенски фустан од Стела Макартни. И додека физички навистина наликува на Кејт Мидлтон, кога станува збор за стајлингот, таа сепак е поопуштена од принцеза која мора да ги следи упатствата на кралските стилисти.
Заедно со Мег, на црвениот тепих се најдоа и нејзините колеги Ед Меквеј и Лутер Форд, кои ги глумеа принцовите Вилијам и Хари во серијата, а и тие се одлучија за неконвенционални модни комбинации. Ед Меквеј ќе го игра принцот Вилијам во серијата. И иако, за разлика од партнерката во серијата, студиите по глума ги завршил во Лондон и има искуство во театар, ова е негова прва улога во серијата, исто како и Мег.