Диетата е клучна за здравјето, но има некои намирници за кои лекарите велат дека може да ги зголемат шансите за затнати артерии.
Мозочниот удар е прекин на протокот на крв во мозокот, или поради затнување на некој крвен сад, што е најчест случај, или поради пукање на крвен сад, кога крвта се излева во мозочното ткиво.
Докторите често наведуваат дека знаеме дека најчести причини за мозочен удар се некои работи на кои можеме да влијаеме: високиот крвен притисок, покачениот шеќер во крвта, високите масти, некои срцеви заболувања, аритмијата, пушењето, прекумерната употреба на алкохол. Исхраната е исто така важна, а д-р Џонатан Цајлингер откри која храна треба да ја избегнувате доколку сте изложени на ризик од мозочен удар. Како што тврди, постојат четири намирници кои можат да ги зголемат шансите за затнување на артериите.
„Тоа се преработеното месо, путерот, бисквитите и пржената храна. Бидејќи повеќето мозочни удари се поврзани со таложење на масни наслаги (атероми) во артериите кои го снабдуваат мозокот, храната која придонесува за ова ќе го зголеми ризикот од мозочен удар. Заситените и транс мастите се клучни виновници“, вели докторот, и додава:
„Високиот крвен притисок предизвикува и формирање на атероми, така што и високиот внес на сол ќе го зголеми ризикот. А високиот внес на шеќер е уште еден клучен фактор на ризик за мозочен удар, делумно поради неговата поврзаност со дебелината и дијабетес тип 2, што предизвикува оштетување и воспаление на артериите“, објасни тој. Од друга страна, постојат намирници кои можат да имаат спротивен ефект и да ја намалат веројатноста за мозочен удар.
„Треба да се стремите да јадете најмалку пет порции овошје и зеленчук на ден. Повеќе студии покажуваат дека поголемата потрошувачка на оваа храна доведува до намалување на стапката на мозочен удар. Се верува дека овошјето и зеленчукот го намалуваат крвниот притисок и содржат антиоксиданси кои помагаат во заштитата на артериите. Овошјето и зеленчукот исто така содржат растителни влакна кои можат да спречат високи нивоа на маснотии, со врзување за холестеролот во нашите црева“, додаде докторот.
Препорачаниот внес на влакна е 30 грама дневно, а ги има во овесот, кафеавиот ориз и лебот од цело зрно. Во мали количини се препорачуваат и здрави масти, кои ги има во изобилство во јаткастите плодови, семките и мрсната риба.