Од сите сетила на кои сакаме да им се препуштаме, мирисот е она што може да го одржи мозокот жив во староста. Истражувачите од Универзитетот во Калифорнија, Ирвин неодамна открија дека изложувањето на одредени мириси додека спиеме значително ја подобрува когнитивната функција.
Нивниот експеримент со 43 возрасни на возраст меѓу 60 и 85 години, кои биле изложени на мириси на роза, портокал, еукалиптус, лимон, нане, рузмарин или есенцијални масла од лаванда во дифузер на воздух два часа во текот на ноќта во период од шест месеци, сугерира дека когнитивниот пад и деменцијата можат да се забават на едноставен начин – да распрскате одреден мирис во спалната соба секоја вечер пред спиење.
Како работи?
Изложеноста на мириси ги подобрува когнитивните способности преку зајакнување на врските помеѓу невролошките области вклучени во меморијата и донесувањето одлуки, според списанието Frontiers in Neuroscience. Познато е дека стимулацијата на сивата материја во староста е од суштинско значење за одржување на добро когнитивно здравје. Ова вклучува решавање на крстозбори, учење на нови содржини, одржување на социјалните врски и сè друго што го поттикнува нашиот мозок да реагира.
Исто така, докажано е дека збогатувањето на животната средина со мириси промовира невропластичност и дека нашата способност за откривање мириси се влошува пред нашата когнитивна способност да почне да опаѓа. Губењето на мирисот е поврзано и со смртта на мозочните клетки, што исто така ја докажува поврзаноста помеѓу мирисот и невролошката функција. Но, за разлика од промените на видот што ги коригираме со очила и оштетувања на слухот за кои имаме слушни помагала, досега немаше совет што да правиме кога ќе почнеме да го губиме сетилото за мирис.