Кога станува збор за непогрешливите модни комбинации, мораме да погледнеме кон елегантната госпоѓица Тејлор Свифт. Познатата пејачка постојано инспирира со своите прекрасни комбинации кои се едноставни по изглед, но совршено дизајнирани и погодни за широк спектар на прилики.
Пејачката, чиј албум „1989 (Taylor’s Version)“ излезе вчера, повторно ги воодушеви фановите со две феноменални комбинации идеални за есен. Заедно со гардеробата, Тејлор се грижи и за шминката (тука можеме да го забележиме црвениот кармин како нејзин личен печат) и фризурата, па лицето на ѕвездата е секогаш блескаво, а косата сјајна и мека.
Свифт беше забележана како шета по улиците на Њујорк во два наврати изгледајќи божествено. Таа за прв пат беше видена како го напушта станот на нејзините пријатели, актерската двојка Блејк Лајвли и Рајан Рејнолдс, кога носеше долга црна поло-маица со слика на глава на коњ и потковица во златна боја во горниот десен дел. Со комбинацијата спои мала светло кафена чанта, високи темнокафеави чизми и едноставно златно ланче.
Нејзината пријателка Блејк Лајвли се одлучи за поопуштена облека, па беше фотографирана во сива маичка, тексас фармерки и сив џемпер. Аутфитот го комплетираше со тексас чанта, големи кафени чевли и кул металик очила за сонце.
Втората комбинација на Тејлор не беше ништо помалку завидна од претходната. Таа беше олицетворение на есенскиот шик кога пристигна во ресторан во Њујорк. Поп сензацијата ги покажа нејзините долги нозе во впечатлива комбинација од кафен кожен блејзер, црна маичка и металик бронзено мини здолниште. За да го комплетира изгледот, таа се украси со златно ланче. Таа без напор го трансформираше тротоарот во нејзина писта, доловувајќи ја суштината на сезоната со стил.
Да потсетиме дека Тејлор Свифт оваа година стана милијардерка. Според Bloomberg Billionaires Index, Тејлор сега вреди вкупно 1,1 милијарда долари, благодарение на нејзината рекордна турнеја „The Eras Tour“. Пејачката стана културен феномен, што дополнително го зголеми нејзиното економско влијание. Во градовите каде што настапувала, бројот на патници во јавниот превоз нагло пораснал, како и пополнетоста на хотелите.