Легендарниот шпански дизајнер Пако Рабан почина на 88-годишна возраст, потврди шпанската групација Пуиг, под која се наоѓа целиот бизнис на Пако Рабан. Нема многу детали за неговата смрт, освен информацијата дека починал во својот дом на северозападот на Франција.
„Куќата на Пако Рабан сака да му оддаде почит на нашиот визионер, дизајнер и основач на модната куќа, кој почина на 88-годишна возраст. Тој беше една од најважните фигури во светот на модата во 20 век. а неговото наследство останува неисцрпен извор на инспирација. Благодарни сме на г-дин Рабан што ги постави темелите на авангардата и што ја дефинираше иднината на неограничени можности“, беше објавено на официјалниот Инстаграм на модната куќа.
Пако Рабан е една од клучните фигури на модната сцена во дваесеттиот век и е еден од дизајнерите кои го донесоа модниот футуризам на сцената. Кариерата ја започна во редовите на Диор, Живанши и Баленсијага, луксузни куќи каде што беше задолжен за дизајнирање накит.
Во шеесетите години на минатиот век, на самиот почеток на својот бренд, кој го основал во 1966 година, тој беше погрешно разбран од јавноста – тој претстави фустан од неконвенционални материјали, како пластика и метал, кои беа многу поевтини и не припаѓаа на концептот на луксуз во тоа време.
Врз основа на моделот на металик фустани, неколку години подоцна беше создадена иконската чанта со синџир, која сè уште е дел од понудата на луксузниот бренд во различни варијанти, а еден од најпознатите изгледи е оној што го носеше актерката Џејн Фонда во филмот „Барбарела“ од 1968 година. Истата година со Пуиг реши да зачекори во светот на парфемите, кој подоцна стана меѓу најпознатите во светот.
Од модниот бизнис се повлече во 1999 година, а креативната визија преку модните колекции на куќата Paco Rabanne сега ја води францускиот дизајнер Жилиен Досена, кој е креативен дизајнер од 2013 година.