Дијабетесот е болест која има влијание на способноста на телото да произведува инсулин, а ова резултира со висок шеќер во крвта. Првите симптоми може да бидат навистина суптилни, па повеќето луѓе ги игнорираат. Ако не се лекува, дијабетесот не само што ќе го намали квалитетот на животот, туку може и да го скрати. Токму поради ова е важно навреме да се открие. Погледнете некои од најчестите рани симптоми кои ќе ви помогнат во тоа.
- Зголемена жед и потреба за во тоалет
Зголемената жед и честото уринирање се најчестите симптоми за дијабетес. Кога имате дијабетес, вашите бубрези не можат да го апсорбираат вишокот шеќер. Поради ова, тој завршува во вашата урина и ги „собира“ течностите од ткивата. Ова ве тера почесто да одите во тоалет и ве дехидрира. За да ја изгаснете жедта пиете уште повеќе течности, а ова води до уште почесто уринирање. Во просек, луѓето одат во тоалет 6-7 пати дневно. Од 4 до 10 пати дневно е нормален број за здрава личност.
- Зголемен глад
Зголемениот глад, заедно со претходните симптоми, е уште еден знак за дијабетес. Ако вашето тело не произведува доволно инсулин, не може да ја претвора храната во глукоза, која пак им е потребна на клетките за енергија. Поради ова, вашиот глад не исчезнува дури и после оброк. Всушност, јадењето само ќе го зголеми нивото на шеќер во крвта. Ако постојано јадете, а гладот не престанува, можеби е најдобро да го посетите вашиот лекар.
- Замор
Друг чест симптом за дијабетес е постојаниот замор. Ако го имате ова нарушување ќе се чувствувате заморно и поспано, и тоа од истата причина од која чувствувате глад – вашите клетки немаат доволно глукоза за енергија. Дехидрацијата поради честото уринирање исто така може да биде причина за заморот. Заморот често е симптом и за други нарушувања, но во комбинација со овие знаци, можеби станува збор за дијабетес.
- Замаглен поглед
Кога замаглениот поглед не е поради проблеми со очите, може да биде ран знак за дијабетес. Ова се случува поради менување на нивото на течност во телото, а ова прави леќите во вашите очи да ја менуваат формата. Оваа промена влијае на способноста за фокусирање, па работите ви изгледаат замаглено. Овие промени не се трајни и вашиот вид ќе се врати во нормала штом ќе се стабилизира нивото на шеќер во крвта. Сепак, ако болеста не се лекува, овие промени може да доведат до слепило.
- Неочекувано слабеење
Неочекуваното слабеење подразбира губење многу од вашата тежина без диети и вежбање. Бидејќи вашето тело не може да користи глукоза кога имате дијабетес, тоа почнува да ги согорува масните наслаги и мускулите. Дехидрацијата исто така е причина за слабеење, бидејќи вашето тело ги користи сите достапни течности за создавање урина. Неочекуваното слабеење е ран знак за дијабетес тип 1, но може да се појави и кај луѓето со дијабетес тип 2.
- Чешање на кожата
Како што напоменавме, кога шеќерот се исфрла преку урината, тој ги собира течностите од вашите ткива, вклучувајќи ја и кожата. Сувата кожа може да предизвика чешање, а со чешањето можете да си направите рани, па дури и инфекции. Друга причина за чешање на кожата се габичните инфекции кои се многу чести кај луѓето со дијабетес.
- Бавно заздравување
Раните кои заздравуваат многу бавно може да бидат знак за дијабетес. Високото ниво на шеќер во крвта не само што го зголемува воспалението на раните, туку ја намалува и циркулацијата. Ова ѝ отежнува на крвта да стигне до оштетените места. Најчесто ова се случува на стапалата. Ако сте забележале дека некои рани заздравуваат побавно од вообичаено, посетете го вашиот лекар.
- Потемната кожа
Кожата најчесто потемнува на места каде што се превиткува, како вратот, пазувите, препоните, лактите, колената и зглобовите на прстите. Иако ова може да се појави и кај здравите луѓе, сепак е чест симптом за дијабетес и најдобро е да се проверите.
- Трнење на дланките и стапалата
Трнењето или болката во дланките и стапалата е уште еден чест симптом за дијабетес. Бидејќи циркулацијата на крвта е забавена, ова води до оштетени нерви. Дланките и стапалата, бидејќи се најдалеку од срцето, се првите кои страдаат.