Спроведени се бројни студии за важноста на квалитетниот сон, а тој заедно со урамнотежена исхрана и редовно вежбање се смета за предуслов за поздрав живот. Но, има ситуации кога сме спиеле препорачаните 7, 8 часа и се будиме многу уморни: „Ако спиете онолку колку што е препорачано, тогаш треба да откриете дали тој сон е навистина квалитетен“, советува д-р Раџ Дасгупта. Лекарот предлага да се посети специјалист, кој може да провери дали постои основно или примарно нарушување на спиењето.
Исто така, постојат и други лесно променливи фактори кои би можеле да ги попречат процесите на закрепнување, вклучувајќи го и заморот.
„Постојат многу состојби кои предизвикуваат замор, но тие не мора да прават луѓето да се чувствуваат како да се подготвени да заспијат“, вели Џенифер Мартин, професорка. Тие обично вклучуваат хронична болка, метаболички состојби или нарушувања на тироидната жлезда, анемија и хронична опструктивна белодробна болест.
Седентарен начин на живот
Ако седиме на работа подолго време, телото може да се навикне и да искористи само малку енергија. Ова ќе направи да се чувствуваме повеќе уморни отколку што треба кога се обидуваме да ги извршуваме основните дневни активности.
Анксиозност или депресија
„И депресијата и анксиозноста можат многу да трошат енергија. Тие негативно влијаат на времето кое ви е потребно за да заспиете, како и на тоа дали и колку пати ќе се разбудите во текот на ноќта“, нагласува д-р Дасгупта.
Дехидрација
Водата е потребна за повеќе функции, вклучително и варење храна и доставување кислород низ телото, а дехидрацијата е поврзана со намалена будност и зголемена поспаност и замор, пишува CNN.
Лоша средина
Добрата хигиена на спиење значи спиење во затемнета просторија на удобна температура. Изложеноста на каква било светлина за време на спиењето е поврзана со неквалитетниот сон, но и со дебелината и сериозни здравствени проблеми, откриваат студиите.
Се препорачува да се избегнува конзумирање на пијалоци со кофеин помалку од шест часа пред спиење и да се ограничи потрошувачката на алкохол и тешка, зачинета храна најмалку два часа пред спиење. Алкохолот може да спречи подлабоки фази на спиење, а тешката храна може да предизвика дигестивни проблеми кои го нарушуваат сонот.
Партнерот исто така може да биде виновен
Можеби вашиот партнер во кревет има пореметување на спиењето, ‘рчи, фрла и се врти или има различен распоред што го нарушува сонот. Домашните миленичиња исто така можат да го нарушат распоредот за спиење, бидејќи немаат исти обрасци на спиење како луѓето, објаснуваат експертите.
Исто така, нарушувањата на спиењето се уште еден фактор кој драматично го намалува квалитетот на сонот. На пример, луѓето со апнеја при спиење се будат многу често, а другите нарушувања на спиењето кои влијаат на нивото на енергија во текот на денот вклучуваат нарколепсија и синдром на немирни нозе.