Од сите совети за спречување мамурлак, се чини дека најголема смисла има пиењето вода за да се спречи дехидрација. Сепак, новата студија не најде докази за поддршка на тврдењата дека пиењето големи количини вода по една ноќ пиење ја намалува болката следниот ден.
Меѓународен тим на истражувачи од Универзитетот во Утрехт ги анализирал податоците собрани од 13 претходни студии, барајќи каква било индикација за поврзаноста помеѓу дехидрацијата и консумирањето алкохол или помеѓу водата и интензитетот на мамурлакот.
Иако не постои единствена причина за мамурлак, алкохолот има диуретично дејство врз телото, зголемувајќи го производството на урина. Ова го зголемува ризикот од дехидрација, за која може да претпоставиме дека е причина за главоболки, болки во телото, гадење и општа малаксаност поврзани со мамурлак.
Многу луѓе исто така пријавуваат дека се чувствуваат жедни и имаат сува уста наутро по една вечер пиење алкохол.
Би било логично да се заклучи дека замена на изгубената течност треба да ги спречи овие симптоми.
Иако податоците не ја отфрлија можноста дехидрацијата и мамурлакот да се случуваат истовремено, немаше докази дека тие се директно поврзани, пишува Science Alert.
Едното не го предизвикува другото, што значи дека замена на изгубената вода нема да има многу ефект врз најлошите делови од мамурлакот.
„Овој преглед заклучува дека мамурлакот и дехидрацијата се две истовремени, но независни последици од консумирањето алкохол“, пишуваат истражувачите во трудот.
Важно е да се има предвид дека сите прегледани студии беа спроведени на релативно мал број луѓе.
Уште повеќе, секој од нив гледаше на различни аспекти на мамурлакот – како на пример зошто некои луѓе го доживуваат почесто – наместо да се фокусира директно на водата за пиење како метод за спречување мамурлак.
И покрај ограничувањата, се чини дека пиењето неколку чаши вода не ве спасува од мамурлак, што е поддржано од претходни студии кои сугерираат дека додека пиењето вода може да ги ублажи некои од ефектите од дехидрацијата, таа нема да ги елиминира другите симптоми на мамурлак (како силни главоболки).