Минерална вода пиеле и античките Грци, а освен тоа и се капеле во неа.
Денешната газирана минерална вода што можеме да ја купиме во продавниците се добива со внесување на природна минерална вода со јаглерод диоксид, што и ги дава карактеристичните освежителни меури, според Eating Well.
Покрај обична минерална вода, денес можеме да купиме и газирана вода со различни вкусови, со или без шеќер или со засладувачи, а на многумина им стана омилен пијалок кој го пијат секојдневно. Но, дали е безбедно да се пие минерална вода секој ден, кои се нејзините придобивки и кој треба да ја избегнува?
„Природната газирана минерална вода содржи електролити како натриум, калиум, калциум и магнезиум. Тоа се всушност минерали кои, растворени во вода, стануваат јони и учествуваат во одржување на балансот на течности во нашето тело“, објаснува Петра Слишко, нутриционист, додавајќи дека овој напиток содржи и други јони како хлорид, флуор, сулфат и водород карбонат.
Бидејќи го хидрира телото на ист начин како и обичната вода, таа е одличен избор за топли денови или вежбање кога обилно се потиме. Ако испиете чаша вода полна со меурчиња, можете да го намалите чувството на глад. Исто така, оваа вода заедно со влакната е клучна состојка за здраво варење, пренесува Данас.
Кој треба да внимава или да избегнува минерална вода?
„Потрошувачката на газирана минерална вода бара претпазливост при одредени состојби и болести“, забележува Слишко и продолжува: „Така, во случај на камења во бубрезите кои настанале со акумулација на калциум фосфат или карбонат, се советува да се избегнуваат газирани пијалоци, додека кај лицата со кардиоваскуларни или хронични бубрежни заболувања, минералните пијалоци треба да се пијат во ограничени количини токму поради присуството на претходно споменатите минерали чие внесување треба да се контролира и модифицира со диета“.
Треба да внимаваат и луѓето кои имаат проблеми со дигестивниот систем.
„Газираните пијалоци исто така може да предизвикаат надуеност или да ги влошат симптомите на одредени дигестивни состојби како што се воспалителна болест на цревата, ГЕРБ и гастритис“, објаснува Петра, додавајќи:
„Доколку сакате да знаете дали потрошувачката на газирана минерална вода се смета за безбедна во вашиот случај и ако е така, во колкава количина, консултирајте се со експерт“, заклучи таа.