Ако стресот продолжи, високите нивоа на кортизол може да го ослабат имунолошкиот систем.
Веројатно веќе сте запознаени со циркулаторниот систем на вашето тело – мрежата на крвни садови, артерии и вени кои носат црвени крвни зрнца и кислород до секој дел од вашето тело.
Дали стресот може да предизвика отечени лимфни јазли?
„Стресот директно не предизвикува отечени лимфни јазли“, вели д-р Семјуел Матис, лекар од семејна медицина.
Тој верува дека стресот може да доведе до отекување на лимфните јазли со тоа што ќе влијае на имунолошкиот систем, а д-р Фредерик Бертли, имунолог, додава дека кога доживуваме стрес, нашето тело го ослободува хормонот кортизол.
Првично, кортизолот го зајакнува имунолошкиот систем, подобрувајќи ја неговата способност да се бори против болести. Но, ако стресот продолжи, високите нивоа на кортизол може да го ослабат имунолошкиот систем, зголемувајќи го ризикот од инфекции кои водат до отечени лимфни јазли.
Колку долго лимфните јазли можат да останат отечени?
„Отекувањето на лимфните јазли опстојува се додека постои имунолошка активност“, објаснува д-р Бертли. Нехроничните бактериски инфекции се расчистуваат побрзо од вирусните инфекции, обично во рок од една до три недели.
Д-р Матис додава дека отечените лимфни јазли кои не се осетливи или се намалуваат во текот на неколку недели генерално не се причина за загриженост и обично не се поврзани со сериозна состојба. Меѓутоа, ако вашите лимфни јазли остануваат отечени повеќе од четири недели, добро е да ги проверите кај вашиот лекар, пренесува The Healthy.
Што значи кога лимфните јазли се отечени?
Во принцип, отечените лимфни јазли укажуваат на тоа дека вашиот имунолошки систем е активен и ја врши својата работа.
„Кога тие отекуваат, тоа е добар показател дека човечкото тело развива имунолошки одговор и е подготвено да се бори со патогени и да го поправи секое оштетено ткиво“, вели д-р Бертли. Меѓутоа, ако отокот продолжи, тоа може да сигнализира подлабок проблем. Во вакви случаи паметно е да се побара совет од лекар.