Замрзнувачот е исклучително практично парче бела техника, благодарение на што можеме безбедно да складираме храна со месеци и да планираме неделни менија. Удобно е да ставите нешто во него за кога имате неочекувани гости – само стоплете некој десерт во микробранова печка и оброкот е готов.
Без разлика што ќе ставите во замрзнувачот, треба да знаете колку долго таа храна може да остане таму. Храната како варено и сурово месо и зеленчук со мал процент на вода може без проблем да се стават во замрзнувач. Но, некои намирници може целосно да се уништат ако ги чувате во замрзнувач, дури и ако се таму само една недела.
Млечните производи се високо на таа скала. „Генерално, млечните производи и производите со висока содржина на масти не се замрзнуваат добро“, предупреди Палак Пател, готвач во Институтот за кулинарско образование Марта Стјуарт. „Кога ќе замрзнете храна или јадења што содржат млечни производи, маснотиите ќе се одвојат од течноста. Полошо од тоа е згрутчувањето.“
Ако го замрзнете млекото, најверојатно ќе го промените неговиот вкус и текстура. Млекото сепак ќе биде добро за готвење, но не толку добро за пиење. Млечните производи се шират додека се замрзнуваат, па затоа мора да внимавате да ги ставите во вистинскиот сад – не ги чувајте во замрзнувач во нивната оригинална амбалажа.
Кога станува збор за замрзнување сирење, факт е дека некои сирења подобро се справуваат со студот од другите. Полумеките сирења како моцарела и благиот чедар се чуваат добро во замрзнувачот, особено ако претходно биле исечени на помали коцки. Од друга страна, тврдите и полутврдите сирења како стар чедар или пармезан стануваат ронливи кога се замрзнат и го губат својот вкус. Треба да се избегнуваат екстремно меки сирења како што се урда, бри и рикота.
Јогуртот е една од намирниците што никако не смеете да ја ставате во замрзнувач. Замрзнувањето ќе ја уништи познатата текстура, а истото може да се случи и со пробиотските култури кои го прават јогуртот суперхрана. Истото е и со павлака: нејзиното замрзнување може да влијае на употребата откако ќе се одмрзне. „Можете да замрзнете само павлака која има 40 проценти или повеќе маснотии“, препорачува Џули Гарден-Робинсон од Државниот универзитет во Северна Дакота. Млечните производи со малку маснотии не се замрзнуваат добро. Замрзнатиот крем нема да се измати до вообичаениот волумен, па може да го промени успехот на рецептот, пишува Ферозан Маст за порталот Best Life.