Говедското мелено месо е лесна храна, лесно се подготвува и со него релативно брзо можете да имате вкусен оброк. Има смисла да складирате повеќе кога ќе наидете на поволна цена.
Сепак, тоа не значи дека можете да го ставите во кеса и да го заборавите некаде во фиоките на фрижидерот.
Како правилно да се чува мелено говедско месо?
Според упатствата на американската Администрација за храна и лекови (ФДА), замрзнатото месо можете да го чувате во оригиналното пакување до два месеци, пренесува Woman’s Day. Ако планирате да го чувате замрзнато подолго од тоа, завиткајте го оригиналното пакување во тешка пластична обвивка или ставете го во кеса за замрзнување за да спречите навлегување воздух. Задолжително напишете го и датумот кога сте го замрзнале, за да не мора да погодувате колку долго е внатре.
USDA исто така забележува дека колку побрзо замрзнете сурово говедско месо, толку подобро. Ако го ставите во замрзнувач веднаш штом се вратите дома од продавница, ќе добиете посвежо месо по одмрзнувањето отколку ако е замрзнато поблиску до рокот на траење или ако е веќе сварено.
Суровото месо што е замрзнато и одмрзнато во фрижидер може повторно да се замрзне ден или два откако ќе се извади од замрзнувачот.
Колку долго меленото говедско месо ќе остане добро во замрзнувачот?
Можеби ќе се изненадите кога ќе откриете дека замрзнатото месо технички може да трае вечно. Но, има датум „најдобро пред“ по кој го губи својот вкус.
Според Водичот на USDA за замрзнување и безбедност на храна, губењето на влагата е голема причина зошто замрзнатото мелено говедско месо го губи вкусот на долги временски периоди.
Суровото говедско месо најдобро се користи во рок од три до четири месеци по замрзнувањето, според USDA. Поради губење на влага во процесот на готвење, варено мелено говедско месо може да издржи два до три месеци во замрзнувачот.
Како правилно да се одмрзне меленото говедско месо?
Никогаш не треба да го одмрзнувате говедското месо на пултот во кујната. На овој начин го изложувате месото на штетни бактерии подолго време. Наместо тоа, ставете го замрзнатото говедско месо во фрижидер преку ноќ за постепено да се одмрзнува. Може да се чува во фрижидер до два дена откако ќе го извадите од замрзнувач.
Замрзнато мелено говедско месо може да се одмрзне во микробранова печка како последна опција. Таквото месо треба да се подготви веднаш по одмрзнувањето.
Кога треба да го одмрзнете вашето замрзнато месо малку побрзо, најдобро е да го ставите во пластична кеса со патент (без да влегува вода) и да го потопите во ладна вода еден до три часа или додека не се одмрзне.