Кетрин, принцезата од Велс, објави дека го завршила третманот со хемотерапија во многу лично и емотивно видео објавено на профилите на Кенсингтонската палата.
Кетрин во март откри дека се лекува од рак и дека била надвор од очите на јавноста поголемиот дел од оваа година.
Но, во емотивната видео порака, таа вели дека оваа година била „неверојатно тешка“ и „животот како што знаете може да се промени за миг“.
Последните податоци за здравствената состојба на Кејт испраќаат позитивна порака за нејзиниот напредок, но има уште долг пат да се помине, наведува Би-Би-Си.
Палатата Кенсингтон посочи дека во оваа фаза не може да се каже дали таа е излечена од ракот.
Принцезата од Велс ги опишува „бурните денови“ од нејзиното искуство со рак како „комплексни, застрашувачки и непредвидливи“.
„Со понизност, се соочувате лице в лице со вашите сопствени слабости на начин на кој никогаш досега не сте размислувале, а исто така добивате нова перспектива за сè“, вели принцезата, во невообичаено лично видео снимено минатиот месец во Норфолк.
Видеото, снимено во есенски бои, покажува колку е задоволна што ја завршила оваа фаза од нејзиното лекување.
„Како што на летото му се приближува крајот, не можам да ви кажам колку ми е олеснето што конечно се заврши со хемотерапијата“, вели таа, видена како вози и пешачи со своето семејство.
Се очекува принцезата да се врати на своите должности подоцна оваа година.
Но, изворите од палатата исто така нагласуваат дека има уште долг пат до целосно закрепнување и дека принцезата ќе го стави главниот фокус на своето здравје во следните неколку месеци.
„Мојот пат до заздравување и целосно закрепнување е долг и морам да продолжам да живеам секој ден како што е“, вели таа.
https://x.com/KensingtonRoyal/status/1833165733368574081?ref_src=twsrc%5Etfw%7Ctwcamp%5Etweetembed%7Ctwterm%5E1833165733368574081%7Ctwgr%5E29af8b241d2bd0ee1f7eb82fd31e2f5d0017f463%7Ctwcon%5Es1_&ref_url=https%3A%2F%2Fn1info.rs%2Fmagazin%2Flifestyle%2Fkejt-midlton-princeza-od-velsa-zavrsila-sa-hemioterapijom%2F
Таа вели дека и покрај тешките времиња, нејзиното искуство и дало „ново чувство на надеж и почит за животот“.
Кетрин се опоравува и не извршува јавни должности веќе поголем дел од годината.
Нејзините здравствени проблеми започнале во јануари кога била хоспитализирана поради неодреден тип на операција на абдоменот.
Принцезата ја откри дијагнозата на рак во март, со видео порака во која се вели дека е на лекување и дека ќе и треба приватност додека закрепне.
Кетрин го опиша како „огромен шок“ по „неверојатно тешки неколку месеци“.
Нејзиното прво јавно појавување годинава беше на Color Salute во јуни, кога мавташе од балконот на Бакингемската палата, а последното во јули кога доби овации на Вимблдон додека присуствуваше на финалето во сингл за мажи.