Сите знаеме дека долната облека и чорапите треба да се менуваат по едно носење, но дали истото треба да се прави и со пижамите?
Пижами (најчесто) не носиме цел ден и во повеќето случаи ги облекуваме после туширање кога сме најчисти, па се чини дека е пречесто да ги менуваме секој ден. Од друга страна, на пижамите се акумулираат мртви клетки од кожата, бактерии, остатоци од производи за нега на тело, а сето тоа – поради пререткото перење – може да доведе до непријатни мириси, иритација и проблеми со кожата.
Колку често треба да ги миете пижамите?
Повеќето луѓе ги менуваат пижамите еднаш неделно или на десет дена.
Некои дури мислат дека тоа треба да биде по едно носење, со оглед на тоа што во нив обично поминуваме 7-8 часа, но ако не се потите многу, а особено ако секогаш се туширате пред спиење, можете да ги носите неколку ноќи.
Треба да се земе предвид и материјалот од кој се направени пижамите. Природните влакна како памук, волна или свила повеќе дишат и не треба да се мијат толку често како синтетичките влакна како најлон, еластин и полиестер. Добро е да се знае дека нечистотијата и маслата полесно се апсорбираат од синтетичките влакна отколку од природните влакна.
На крајот, ќе треба сами да процените кога е време за миење. Секако, доколку има непријатен мирис или забележите дамки, задолжително измијте го.
Кога треба да менуваме пижами секој ден?
Во одредени случаи, потребно е да се измијат по едно носење. На пример, ако не сте се пресоблекле наутро, цел ден сте го поминале во пижами затоа што можеби сте работеле од дома или сте биле болни.
Важен фактор е дали одоздола носите само пижами или долна облека. Ако носите само пижами, треба да ги третирате како долна облека и да ги менувате секој ден.
Последици од перење пижами премногу ретко
Просечен човек поминува околу една третина од денот во кревет. Оние кои не ги мијат пижамите доволно често го зголемуваат ризикот од осип, инфекции, влошување на алергиите и MRSA (Staphylococcus aureus отпорен на метицилин).
Во секој случај, доколку не сакате да ги менувате пижамите секој ден, би било добро да се истуширате вечерта пред да ги носите и да не користите премногу лосион за тело после туширање.