За жал, повеќето од нас се запознаени со земјотресите, па затоа оваа разорна појава не бара посебен вовед. Од научна гледна точка, тоа е ненадејно ослободување на енергија во Земјината кора, што предизвикува сеизмички бранови да патуваат кон површината и да предизвикаат вибрирање на земјата. И додека некои земјотреси се безопасни, други рушат огромни згради како на шега, тонат бродови и предизвикуваат цунами.
Местото од каде потекнува земјотресот во длабочината на Земјата се нарекува хипоцентар или фокус на земјотресот. Може да биде директно под површината до длабочина од 750 километри – земјотрес со подлабока фокусна точка досега не е регистриран. Земјотресите се случуваат долж границите на тектонските плочи, најчесто на местата каде што се среќаваат, а главна причина за нивното движење е течењето во внатрешноста на Земјата, што е предизвикано од температурната разлика помеѓу жешкото јадро на Земјата и постудената површина.
Земјотресот вибрира од хипоцентарот во сите правци со различни бранови. Годишно на Земјата се регистрираат повеќе од милион земјотреси, главно незабележливи за човечките сетила – а 20 до 30 земјотреси годишно предизвикуваат човечки жртви. Но, се прашуваме, дали потресите може да се почувствуваат и во авионот?
„Кога сеизмичките бранови ја напуштаат Земјината кора и минуваат низ атмосферата, тие се претвораат во звучни бранови. Меѓутоа, бидејќи овие бранови обично се под опсегот на звук што луѓето можат да го слушнат (под 20 херци), тие остануваат незабележани“, велат научниците на scienceabc.com и додаваат како татнежот што го слушаме за време на земјотрес е предизвикан од сеизмички бранови кои се движат низ цврст материјал, како што се карпи или бетон.
Брановите постепено ја губат својата енергија со текот на времето и растојанието, и како резултат на тоа, нивниот интензитет слабее додека патуваат низ медиум како што е воздухот. Затоа, на пример, поради природата на бранот, можеме добро да го слушнеме предавачот на факултет ако седиме во првиот ред до него, а во последниот ред ќе звучи потивко.
Така, дури и ако сеизмичките бранови успеат да поминат растојание од околу 11 километри, или висината на која обично летаат авионите, тие би биле толку ослабени што нема да ги слушнете над звукот на моторите на воздушното летало, а камоли да ги почувствувате вибрациите како на земјата. Затоа, најбезбедно место за време на земјотрес е авионот, под услов да лета, односно да е во воздух.