Се повеќе има туристи кои својата дестинација ја избираат врз основа на видеата и фотографиите кои ги гледаат на некои од социјалните мрежи. Иако не може да се каже дека се работи за тренд кој се смета за нов, се чини дека се зголемува бројот на луѓе кои на ваков начин се одлучуваат за својата следна дестинација.
– Местата каде што можете да направите фасцинантни фотографии се навистина популарни – изјави за Си-Ен-Ен Ема Баркер, виш уредник на њујоршкиот магазин „Time“.
Тимот на уредници на споменатото списание направи листа на 100-те најубави места во светот кои треба да се посетат во текот на оваа година, а во таа прилика забележале многу интересни и нови трендови во патувањето.
Патувачки активности
Се чини дека помладите луѓе кои патуваат се повеќе свесни за ефектот на социјалните мрежи, кои исто така имаат влијание врз трендовите на патувањето.
При составувањето на листата на најфасцинантните места во светот, уредниците на споменатото списание забележале нешто интересно. Многу тур-оператори понудија „пресврт на традиционалното искуство“. Како пример за ова, Баркер наведе сафари со велосипед во Боцвана.
За разлика од традиционалното, кое вклучува возење џип и гледање диви животни, сафарито со велосипед значи дека туристите уживаат не само во глетката на дивите животни во нивната природна средина, туку и во возењето велосипед.
Учење додека патувате
Новина е вселенскиот туризам, но и тоа што многу туристи при посета на избраната дестинација се стремат да научат и откријат нешто.
Ова е поткрепено со фактот што, на пример, патувањата до Антарктикот забележаа пораст. Еден организатор на вакви тури воспостави соработка со научници кои работат на Антарктикот, така што туристите не само што ќе имаат можност да научат нешто ново, туку и ќе можат на некој начин да им помогнат на научниците.
– Тие не го зголемуваат бројот на дојдовни летови, туку на одреден начин им помагаат на научниците кои работат на Антарктикот. А потоа и туристите имаат можност да помогнат, но и да научат нешто ново за Антарктикот и да дознаат како можат да го заштитат – објаснува Баркер.
Што друго е ново?
Во Ново Мексико има многу модерна академија за сениори. Поточно за средовечни луѓе, што се смета за значајна новина во светот на велнесот.
Во оваа смисла, на посетителите им се нуди можност да запознаат други кои минуваат низ истиот период од животот.
– Тоа е како рај за средовечни луѓе, што мислам дека е навистина интересно и забавно. Може да се гледа како револуција во светот на велнесот – вели Баркер.
Новина е и таканаречениот регенеративен туризам каде акцентот е ставен на животната средина и нејзината заштита, како и на волонтерскиот туризам. Во овој случај, при посета на одредени дестинации, на туристите им се нуди можност да волонтираат во локалната заедница.